Даныя сацдаследаванняў: амаль 94 працэнты беларусаў у перыяд COVID-19 носяць маскі ў грамадскіх месцах

Рэспандэнтам прапаноўвалася назваць асноўныя меры, якія прымаюцца імі ва ўмовах распаўсюджвання COVID-19. "Гэта вынікі апошняга замеру, і мы бачым, што для больш як 90 працэнтаў насельніцтва агульнаўжывальнымі практыкамі стала нашэнне масак у грамадскіх месцах (93,9 працэнта), а таксама рэгулярнае мыццё рук і выкарыстанне антысептыкаў (91,7 працэнта). Больш таго, тэндэнцыю, што гэтыя нормы замацоўваюцца, пацвярджае яшчэ адно пытанне, якое мы задалі рэспандэнтам, - як яны ставяцца да людзей, якія не носяць маску ў грамадскіх месцах і не захоўваюць сацыяльную дыстанцыю. У прыватнасці, 60 працэнтаў насельніцтва выказалі рэзкую крытыку такіх паводзін. І якраз-такі гэты маральны аспект вельмі важны, каб меркаваць аб замацаванні нашэння маскі, выканання сацыяльнай дыстанцыі як новай нормы паводзін, паўнапраўнай сацыяльнай практыкі ў бягучах умовах. Таксама ў топе практык, якія рэгулярна рэалізуюцца насельніцтвам, - абмежаванне наведвання гандлёвых цэнтраў і грамадскіх месцаў, сустрэч з сябрамі і сваякамі, пажылымі людзьмі, абмежаванне выкарыстання грамадскага транспарту і адмена паездак за мяжу", - расказаў Максім Кудрэвіч.

Што датычыцца ацэнкі здольнасці беларускай сістэмы аховы здароўя процістаяць распаўсюджванню COVID-19, то гэты паказчык толькі ўзрастае - з 50,3 працэнта ў красавіку 2020 года да 67 працэнтаў у сакавіку 2021-га. "Яшчэ адным важным крытэрыем адэкватнай ацэнкі насельніцтвам пагрозы распаўсюджвання COVID-19 з'яўляецца ацэнка чакання развіцця сітуацыі. Тут мы таксама бачым пазітыўную тэндэнцыю адносна дынамікі, у рамках якой насельніцтва ўсё больш спадзяецца на паляпшэнне сітуацыі і ўсё менш чакае яе пагаршэння. Таксама было вывучана стаўленне да вакцынацыі ад COVID-19. Гэта вынікі замеру сакавіка 2021 года. Тут мы бачым прыблізна аднолькавае станоўчае і адмоўнае стаўленне да вакцынацыі (43,7 працэнта і 42,8 працэнта адпаведна). Тлумачыцца гэта даволі проста ў кантэксце таго, што масавая вакцынацыя ў Беларусі пачалася толькі ў красавіку, а сакавік - якраз час недастатковай інфармаванасці, сумненняў, розных чутак у інфармацыйнай прасторы. І ў бліжэйшым замеры, які будзе праведзены ў кастрычніку - пачатку лістапада, мы чакаем паляпшэння дадатных тэндэнцый адносна вакцынацыі. У тым ліку абапіраючыся на даныя статыстыкі аб тым, што першую дозу вакцыны на гэты момант у Беларусі атрымала ўжо амаль 20 працэнтаў насельніцтва, што, безумоўна, не можа не радаваць".

Як дадаў навуковы супрацоўнік Інстытута сацыялогіі НАН Беларусі Яўген Навіцкі, усяго інстытут правёў 5 хваль даследаванняў, звязаных з распаўсюджваннем COVID-19 і адносінамі насельніцтва да гэтай праблематыкі. "4 хвалі было ў 2020 годзе, там выбарка складала ад 600 рэспандэнтаў. У 2021-м было праведзена даследаванне, дзе было 1050 рэспандэнтаў. Усе даследаванні праведзены метадам тэлефоннага апытання. Выбаркі былі рэпрэзентатыўнымі. Апытваліся па бліжэйшай даце нараджэння. Апытаныя ад 18 гадоў і старэйшыя. Апытанне праводзілася ва ўсіх абласных цэнтрах і Мінску, раённых гарадах і сельскіх населеных пунктах", - канстатаваў ён.