Служба знешняй разведкі Расіі атрымала даныя аб падрыхтоўцы рэзананснай правакацыі ў Беларусі

Служба знешняй разведкі Расіі (СЗР) атрымала даныя аб падрыхтоўцы рэзананснай правакацыі ў Беларусі. Аб гэтым гаворыцца ў заяве СЗР Сяргея Нарышкіна, тэкст якой распаўсюдзіла прэс-бюро СЗР, паведамляе карэспандэнт БЕЛТА. Паводле слоў Сяргея Нарышкіна, у падрыхтоўцы пратэстаў у Беларусі, якая ажыццяўляецца ў Польшчы, краінах Балтыі, Украіне і іншых дзяржавах, удзельнічаюць інструктары з ЦРУ і Пентагона, а таксама афіліраваных з Дзярждэпартаментам амерыканскіх няўрадавых арганізацый. "ЗША выкарыстоўваюць самыя нячыстыя метады для разварушвання сітуацыі ў Беларусі, - указаў кіраўнік СЗР. - У рабоце з беларускай апазіцыяй амерыканцы зрушваюць фокус увагі на павышэнне актыўнасці яе сілавога крыла з ліку радыкальных нацыяналістаў. Дзярждэпартамент разгарнуў работу па падключэнні да пратэсных выступленняў экстрэмісцкіх элементаў". Дырэктар СЗР заявіў таксама аб умяшанні ЗША ў рэлігійную сітуацыю ў Беларусі. "Паводле існуючых даных, ЗША таксама бесцырымонна ўмешваюцца ў рэлігійную сітуацыю ў Беларусі, імкнучыся сутыкнуць прадстаўнікоў праваслаўнай і каталіцкай галін хрысціянства, - адзначыў ён. - Спрабуючы ўцягнуць у беларускія падзеі Ватыкан, які пакуль што праяўляе стрыманасць, амерыканцы вядуць работу па больш актыўным падключэнні каталіцкіх свяшчэннікаў да ўдзелу ў антыўрадавых выступленнях". "Да кліру рымска-каталіцкай царквы даводзяцца заклікі адкрыта выступіць з крытыкай беларускіх улад і выкарыстоўваць рэлігійныя мерапрыемствы, у тым ліку пропаведзі, малебны, хрэсныя хады, для вядзення апазіцыйнай палітычнай прапаганды сярод вернікаў, - указаў Сяргей Нарышкін. - Паводле задумы амерыканцаў, гэта павінна вымусіць Мінск да жорсткіх мер у адказ у адносінах да рымска-каталіцкай царквы. Паводле існуючых даных, цяпер за мяжой сярод па-экстрэмісцку настроеных праціўнікаў цяперашніх улад Беларусі выношваецца план рэзананснай правакацыі, у ходзе якой быў бы арыштаваны або нават паранены ці забіты адзін з аўтарытэтных свяшчэннаслужыцеляў РКЦ. Разлік на тое, што гэта дасць магчымасць істотна павысіць антыўрадавыя настроі сярод католікаў і падштурхнуць іх да больш актыўнага ўдзелу ў вулічных пратэстах". Па матэрыялах сайта БЕЛТА.