Лукашэнка ўсклаў кветкі да Магілы Невядомага Салдата ў Маскве

Прэзідэнт Беларусі Аляксандр Лукашэнка сёння ў Маскве ўсклаў кветкі да Магілы Невядомага Салдата ля Крамлёўскай сцяны, перадае карэспандэнт БЕЛТА. Ва ўрачыстай цырымоніі прымалі ўдзел Прэзідэнт Расіі Уладзімір Пуцін і кіраўнікі іншых дзяржаў, якія прыбылі ў расійскую сталіцу на ўрачыстасці ў гонар 75-годдзя Перамогі ў Вялікай Айчыннай вайне. Яны ўшанавалі мінутай маўчання памяць загінулых у гады вайны. Магіла Невядомага Салдата знаходзіцца ў Аляксандраўскім садзе ля сцен Крамля. Комплекс уключае надмагільную пліту, на якой устаноўлена бронзавая кампазіцыя - салдацкая каска і лаўровая галіна, якія ляжаць на сцягу. У цэнтры - ніша з надпісам "Імя тваё невядома, подзвіг твой бессмяротны" з бронзавай зоркай, у сярэдзіне якой гарыць Вечны агонь. Злева ад магілы размешчана сцяна з надпісам "1941 Паўшым за Радзіму 1945", справа - гранітная алея з блокамі, на якіх нанесены назвы гарадоў-герояў, уключаючы Мінск, а таксама Брэсцкай крэпасці, і выява медаля "Залатая Зорка". У блоках змешчаны капсулы з зямлёй гарадоў-герояў. Перад урачыстай цырымоніяй Аляксандр Лукашэнка разам з іншымі высокапастаўленымі гасцямі прысутнічаў на ваенным парадзе, які прайшоў на Краснай плошчы. У гэтым годзе ў Расіі парад з нагоды 75-годдзя Перамогі быў перанесены з 9 мая з-за пандэміі каранавіруса. Прэзідэнт РФ выбраў дату 24 чэрвеня, таму што менавіта ў гэты дзень у 1945 годзе адбыўся гістарычны парад Пераможцаў. Як паведамлялася, у Беларусі ваенны парад у азнаменаванне 75-й гадавіны Вялікай Перамогі правялі 9 мая. У ім удзельнічалі каля 3 тыс. ваеннаслужачых і звыш 150 адзінак тэхнікі, у небе над Мінскам праляцелі 36 самалётаў і верталётаў. "Гэта свята для нас свяшчэннае. Трагедыя беларускага народа, які вынес на плячах тытанічны груз страт і разбурэнняў самай бязлітаснай вайны XX стагоддзя, непараўнальная ні з якімі цяжкасцямі сённяшняга дня", - падкрэсліў на ваенным парадзе Прэзідэнт Беларусі. Напярэдадні візіту ў Маскву кіраўнік беларускай дзяржавы прыняў удзел у серыі памятных мерапрыемстваў. 20 чэрвеня з удзелам Аляксандра Лукашэнкі адкрылі мемарыяльны комплекс памяці спаленых вёсак Магілёўскай вобласці, які размешчаны ў вёсцы Боркі Кіраўскага раёна. На наступны дзень Прэзідэнт наведаў Светлагорскі раён, дзе адбылася цырымонія адкрыцця мемарыяльнага комплексу "Ала" на месцы спаленай у гады вайны нацыстамі вёскі. У дзень пачатку Вялікай Айчыннай вайны, 22 чэрвеня, кіраўнік дзяржавы зрабіў паездку ў Брэст. Аляксандр Лукашэнка наведаў Брэсцкую крэпасць, дзе па традыцыі ў час пачатку вайны прайшло памятнае мерапрыемства. Па матэрыялах сайта БЕЛТА.